1
لواليدة لواليد زوج كلمات معمري جربت نقولهم لشي واحد ولا نحس بديك لعاطفة من جيهتو حيت مني تنعقل على راسي تيقولو ليا بلي لقاوني قدام باب لخيرية فزيف هادشي كان ديما مرضني حيت عارف ولد لخيرية ديما محكور ومعمرها تبدل لمهم عائلتي لوحيدة هيا دراري ولبنات لي معايا من تنعقل على راسي و واحد لبنت معايا غتكون صغر مني بشي 3 سنين مسمينها حورية لمهم كبرنا غير فلخيرية لقراية و كورة لبلية ديالي لكورة ديما ماتشات وكدا حتى دخلت لواحد لمدرسة قريبة تابعة لنادي ديال لوداد بديت تنمشي تما فلعشيا ديك ساعة كانت عندي 18 وأنا عارف بلي خاصني نخرج هاد لعام و مزال لباك معنديش وليت تنعطي وقتي كامل لكورة ولونطريما حيت ديما تنسمع بدراري صدقات ليهم و ولاو تيلعبو مع فراقي كبار حتى أنا هادشي لي بغيت ندير و نوريهم ولد لخيرية علاش قاد واحد ليلة راجع من لونطريما داخل ننعس حتى تتجي عندي حورية تتجري قلت ليها مالك قالت ليا شي ولاد منعرف مالهم معايا من صباح ودخلو علينا لبيت أنا عدويا لي يدور بيها حيت عزيزة عليا كابرين مع بعضياتنا و تتقوليا غير خويا لكبير وأنا ندخل لكوزينة هزيت واحد لمقلة من يدها قلت ليها زيدي معايا دخلنا لقيت خوتنا تيقلبو ليها فحوايجها قلت ليهم من نيتكم أولاد لعبد أش هاد لفعايل ديال لمكبوتين واش حنا معندناش لي يحامي علينا ونزيدو نحكرو على بعضياتنا راه عييب قاليا حمزة خرج من باب واسع وبعد علينا بغا يجرها وأنا نحط ليه ديك لمقلة فودنو طاح قلت ليهم ولله ويقرب ليها شي واحد حتى نقتل ديلمو ومن لخيرية لحبس هانية زريتهم حتى تتدخل لمسؤلة شنو واقع قالت ليها حورية شنو واقع دات خوتنا لبيرو ديالها بقيت بارك أنا مع لبنت قلت ليها بلي مبقى والو ونشوف كيفاش نخرجو وبلي مغاديش نخليها هنا تتشوف فوجهها إبتسامة أمل بعدا عندها أمل تخرج من هنا وتعيش مزيان لأمل لي هو أنا لمهم نعسات هيا خرجت أنا من تما مشيت نعست لغد ليه مع فايق لقيت لمدير ولمسؤولة عند راسي قاليا ولدي حمزة نتا فتي 18 شحااال هادي خاصك تخرج تقلب فين تعيش وتبني مستقبلك فبلاصة أخرى بغيت نطلبو حيت معمري خرجت ولا عشت برى ولكين بعد داك صداع ديال لبارح موحال يخليوني قلت ليه بلي غنخرج يعطيني غير سيمانة باش نشوف فين غادي نمشي قاليا صافي خود حتى زوج سيمانات غير دير بلي غتخرج فبالك قلت ليه صافي دبا حتى لخيرية مغتبقاش قابلة عليا مبغيتش نقولها لحورية حيت أنا هو خوها لي تقدر تعول عليه تما لمهم دازو واحد ليوماين متيجينيش نعاس بليل حتى لنهار 3 مشيت لونطريما تيقولينا لمدرب بلي غدا غيجي شي مدرب من لبرازيل غيعزل شي دراري غيديهم يحتارفو تما أنا قلت صافي غنمشي حيت عارف راسي لمقود فدوك دراري وباغي نمشي مشيت لخيرية بقيت ليل كامل تنفكر كيفاش غنلعب غدا صباح غسلت وجهي خرجت تنجري شويا مع 12 خرجت مشيت لتيران مع قرب لماتش تيبانو ليا دراري جداد عمىي شفتهم وباينا من لبسهم غادي يلعبو جا داك لبرازيلي وجايب معاه دراري ديالو لي غيلعبو ضدنا بدا لماتش لعبو غير دوك دراري جداد على أساس أنهم كانو تيترينيو معانا وفاشلييين بزز باش تيحركو كورة وباينة فيهم ملعقين أنا قلت هانية دبا يدخلنا لمدرب فلميطا تانية والو وخاسرين ب 5-0 حتى بقات شي ربع ساعة وأنا نمشي عندو قلت ليه عمي لله يحفظك لما دخلني ولله حتى محتاج ندخل بزااف ونقدر نحمر ليك وجهك قدام خونا ومعمري نسا خيرك قاي دخل خرج واحد خونا أنا مع دخلت بديت تنغوت لدراري يعطيوني كورة والو مبغاوش لي تيشد كورة تيبغي يبان بقيت تنغوت حتى قرب يسالي لماتش وأنا مزال مشديتهاش مع شديتها طيارة لبوطو ديال خوتنا لول تاني قربت لبوطو وأنا نصرفقها بواحد لكوشية علقتها ف 90 وهو يصفى حكم سالا لماتش ب 5-1 لفرحة بقينا واقفين تما حتى جا داك لمدرب لبرازيلي قال واحد زوج سميات و أنا نسمع حمزة ناري لفرحة ديال بصح حطيت أول خطوة فطريق باش نبني مستقبلي قاليا بلي غدا غيجي باش يقاد لوراق ولكونطرا باش نمشي معاه و موافقة واليديا قلت ليه معنديش ولكين أنا عندي لكارط وممحتاج موافقة حتى واحد قاليا صافي غدا جي لهنا باش نعطيك لوراق ولغد ليه نمشيو قلت ليه صافي غادي راجع لخيرية و مبقالي فيها غير يوماين بلحساب غادي نتوحش دراري وكلشي ولكين أكتر حاجة حورية لي منقدرش نخليها لوحدها تما وحتى هيا أنا عارفها درويشة لأقصى درجة ويقدرو يتعداو عليها تما نهار لول مني نمشي ...
(يتبع)
ليست هناك تعليقات:
إرسال تعليق